顶真个香港姆妈
讲述：曹凯
临近端午节我乘上732路公交车，到浦北路五芳斋粽子店去买粽子。
偶然听到旁边座位个两位阿姨对话谺气有意思。暂且将两位阿姨称为阿姨甲与阿姨乙吧。
阿姨甲对阿姨乙讲：“阿拉姆妈长期蹲勒香港，搿段辰光住勒我搿搭，讲貱（be）侬听搞笑个事体莫老老了，老人顶真是顶真得唻。我妹妹有一趟夜里下班回来，顺带便买了一眼肉回来，刚刚放进冰箱，阿拉姆妈就讲了，肉一定要早浪向买热气个，冰箱里摆一夜天味道勿灵了。”阿姨乙讲：“看来㑚姆妈还蛮讲究营养个噢。”阿姨甲讲：“搿个勿算啥，噶咾蛮多辰光侪是伊自家去买菜个，难板我去买菜，譬如买转来肉，伊就会问侬到阿里搭买个？我讲我勒拉买素菜个楼浪向买个，伊马上就会纠正我讲，侬应该到马路对面中国银行旁边个搿爿肉店买再对！侬啊就是糊涂，勿是随便啥个摊头侪好买个。”阿姨乙接勒讲：“看来㑚姆妈真是一个顶真个香港老太太。”
阿姨甲讲：“是啊，死板是死板得勿得了，烧菜来得讲究营养，开始蹲勒拉阿拉阿妹屋里，姆妈烧个营养菜，阿妹屋里个人侪勿要吃，搿记就苦了姆妈了，伊拉味道勿配胃口就上馆子，剩菜剩饭就只能姆妈上顿吃了，热热伊下顿吃了。我讲搿个哪恁来讪啊，就接到我屋里来了。”阿姨乙讲：“㑚姆妈还真蛮有劲个。”阿姨甲讲：“是个呀！带伊到教堂里去，伊一定要我来交关简体字读貱（be）伊听，伊还谺气认真个注上繁体字进行对照，勿认得A，就讲是高压电线架；勿认得B就讲两只零汤团上下叠勒一道；勿认得C就讲半只圆立勒嗨；勿认得H就讲连牢两岸个一座桥。还一直指出我前做后忘记个毛病，侬啊总是走到阿里，厾到阿里。”阿姨乙听了笑得直勿起腰来了，讲：“㑚吤顶真个姆妈活到老、学到老，至少勿会得得老年痴呆症。”到站了，两位相伴走下车厢。
听了伊拉生动个对话，顶真个香港姆妈貱（be）周边个乘客留下了深刻个印象。
往期回顾：
图：网络 / 编辑：渺渺